उदगीर/अंबादास करकरे
लातूर जिल्ह्यात अवैध धंद्यांविरोधात सुरू असलेल्या विशेष मोहिमेला गती देत उदगीर ग्रामीण पोलिसांनी जुगार अड्ड्यावर धाड टाकून मोठी कारवाई केली आहे. या कारवाईत जुगाराचे साहित्य, चार मोटारसायकली, एक ऑटो रिक्षा, तीन मोबाईल फोन आणि रोख रक्कम असा एकूण ३ लाख ७३ हजार ९०० रुपयांचा मुद्देमाल जप्त करण्यात आला आहे. तसेच दोन आरोपींना ताब्यात घेण्यात आले असून चार आरोपी अंधाराचा फायदा घेत घटनास्थळावरून पसार झाले आहेत.
पोलीस अधीक्षक अमोल तांबे यांच्या मार्गदर्शनाखाली जिल्ह्यात अवैध व्यवसायांविरोधात विशेष मोहीम राबविण्यात येत आहे. त्याच मोहिमेअंतर्गत दि. २८ जून २०२६ रोजी सायंकाळी सुमारे ८ वाजता उदगीर शहरातील जळकोट रोड, इंडिया नगर परिसरात एका हॉस्पिटलच्या दिशेने जाणाऱ्या रस्त्यालगत झागीरदार यांच्या शेतातील पत्र्याच्या शेडमध्ये काही जण 'तीरट' नावाचा जुगार खेळत असल्याची गोपनीय माहिती उदगीर ग्रामीण पोलिसांना मिळाली होती.
माहितीची खातरजमा करून पोलिसांनी तत्काळ घटनास्थळी छापा टाकला. या कारवाईत वसीम दस्तगीर शेख (वय २५, रा. हावगीस्वामी मठ चौक, उदगीर) आणि आमेर बशीर हाश्मी (वय ३२, रा. दर्गा चौक, उदगीर) हे दोघे जुगार खेळताना रंगेहात सापडले. मात्र पोलिसांची चाहूल लागताच शकील राजमहम्मद लदाफ, बबलू खाँजा सय्यद, खाँजा युसुफ शेख आणि आशपाक बारी पटेल हे चार आरोपी अंधाराचा फायदा घेत घटनास्थळावरून पळून जाण्यात यशस्वी झाले.
छाप्यामध्ये पोलिसांनी जुगाराचे साहित्य, चार मोटारसायकली, एक ऑटो रिक्षा, तीन मोबाईल फोन आणि रोख रक्कम असा एकूण ३ लाख ७३ हजार ९०० रुपयांचा मुद्देमाल जप्त केला. या प्रकरणी उदगीर ग्रामीण पोलीस ठाण्यात गुन्हा क्रमांक ४४३/२०२६ दाखल करण्यात आला असून महाराष्ट्र जुगार प्रतिबंधक कायदा कलम १२(अ) अंतर्गत गुन्ह्याची नोंद करण्यात आली आहे.
या गुन्ह्याचा पुढील तपास पोलीस अमलदार केंद्रे करीत असून फरार चार आरोपींच्या अटकेसाठी विशेष पथके नियुक्त करण्यात आली आहेत. पोलिसांकडून त्यांचा शोध सुरू असून लवकरच त्यांना अटक करण्यात येईल, असा विश्वास व्यक्त करण्यात आला आहे.
अवैध धंदे, जुगार आणि गुन्हेगारीविरोधात लातूर पोलिसांनी सुरू केलेली कारवाई आगामी काळातही अधिक तीव्र करण्यात येणार असल्याचे पोलिसांकडून स्पष्ट करण्यात आले आहे.
Post a Comment
0 Comments