लातूर पोलिसांची तात्काळ आणि संवेदनशील कारवाई : अल्पवयीन मुलीला त्रास देणाऱ्या आरोपीस अटक; केवळ २० तासांत तपास पूर्ण करून आरोपपत्र दाखल.

लातूर/ अंबादास करकरे 

लातूर, दि. १८ नोव्हेंबर २०२५ — लातूर शहरातील गांधी चौक पोलीस ठाणे हद्दीत एका अल्पवयीन मुलीच्या छेडछाडीचा गंभीर प्रकार उघडकीस आला असून, या प्रकरणात लातूर पोलिसांनी अतिशय जलद, संवेदनशील आणि प्रभावी कारवाई करत आरोपीला तात्काळ अटक केली. विशेष म्हणजे, अवघ्या २० तासांच्या अल्पावधीत तपास पूर्ण करून न्यायालयात दोषारोपपत्र दाखल करण्यात आले आहे.

दि. १७ नोव्हेंबर २०२५ रोजी दुपारी अंदाजे २.३० वाजता इसराईल कलीम पठाण (वय २७ वर्षे, रा. गौसपुरा, लातूर) हा तरुण फिर्यादीच्या घरात अनधिकृतरित्या शिरला आणि अल्पवयीन मुलीचा हात पकडून तिचा विनयभंग केला. केवळ इतकेच नव्हे तर, या आरोपीकडून पीडित मुलीचा वारंवार पाठलाग, त्रास तसेच तिच्या कुटुंबियांना जिवे मारण्याच्या धमक्या देण्याचेही प्रकार यापूर्वी घडले होते.

अचानक वाढत्या त्रासामुळे पीडित मुलगी आणि तिचे कुटुंब मानसिक तणावात होते. अखेर कुटुंबाने पोलिसांकडे धाव घेतली आणि तक्रार नोंदवली.

तक्रार मिळताच गांधी चौक पोलीस ठाण्यात गुन्हा क्रमांक ५३६/२०२५ अंतर्गत भारतीय न्याय संहिता (BNS) कलम ७४, ७८, ३३३, ३५१(२)(३) तसेच बाल लैंगिक अत्याचार प्रतिबंधक कायदा (POCSO Act) कलम ८, १२ प्रमाणे गुन्हा नोंदवण्यात आला.

घटनेची माहिती मिळताच पोलीस अधीक्षक अमोल तांबे यांनी त्वरित कारवाईचे आदेश दिले. त्यानंतर अपर पोलीस अधीक्षक  मंगेश चव्हाण व उपविभागीय पोलीस अधिकारी समीरसिंह साळवे यांच्या मार्गदर्शनाखाली, पोलीस निरीक्षक सुनील रेजितवाड यांनी दोन स्वतंत्र शोधपथके तयार केली.

या पथकांनी आरोपीच्या हालचालींची गुप्त माहिती गोळा केली, रहिवासाजवळील परिसराची पाहणी केली आणि अखेर आरोपी इसराईल कलीम पठाण यास ताब्यात घेण्यात यश मिळवले. त्यानंतर त्याची कायदेशीर अटक प्रक्रिया पूर्ण करण्यात आली.

अवघ्या २० तासांत तपास पूर्ण या प्रकरणाचा तपास पोउपनि गणेश चित्ते यांनी वेगाने आणि काटेकोरपणे पूर्ण केला. घटनास्थळाचा पंचनामा, पुरावे, साक्षीदारांचे जबाब, इतर आवश्यक कागदपत्रे यांची शहानिशा करून आरोपीविरुद्ध सबळ पुरावे गोळा करण्यात आले. त्यानंतर पोलिसांनी आरोपीसह सर्व आवश्यक दस्तऐवज न्यायालयात सादर करून अवघ्या २० तासांत आरोपपत्र दाखल केले.

या वेगवान आणि संवेदनशील कारवाईत पोलीस पथकातील खालील अधिकाऱ्यांनी महत्त्वाची भूमिका बजावली:

पोउपनि गणेश चित्ते, मपोउपनि श्रीमती पोवार, सफौ राजेंद्र टेकाळे, पोलीस अंमलदार प्रकाश भोसले, रविसन जाधव, राहुल दरोडे, सचिन चंद्रपाटले, योगेश चिंचोलीकर, रवि कानगुले, सचिन जाधव, शिवानंद गिरबोने, महिला पोलीस अंमलदार संध्या कांबळे, सुमन कोरे, लता बनसोडे, राखी गायकवाड.

लातूर पोलिसांची संवेदी आणि नागरिक-केंद्रित कामगिरी

अल्पवयीन मुलीचे संरक्षण, न्यायप्रक्रियेत पारदर्शकता आणि गुन्ह्यांविरुद्ध कठोर भूमिका ही लातूर पोलिसांची सातत्यपूर्ण भूमिका आहे. या प्रकरणातील जलद कारवाईमुळे पोलिसांची दक्षता, संवेदीता आणि गुन्हेगारांना न जुमानणारी कार्यपद्धती पुन्हा एकदा अधोरेखित झाली आहे.

नागरिकांना आवाहन

लातूर पोलिसांकडून आवाहन करण्यात येते की 
अल्पवयीन मुलींच्या सुरक्षेशी संबंधित कोणतीही छेडछाड, त्रास, पाठलाग किंवा संशयास्पद हालचाल दिसल्यास त्वरित पोलिसांना कळवावे. प्रत्येक तक्रारीला गांभीर्याने घेत तात्काळ आणि कायदेशीर कारवाई केली जाईल.