उदगीरच्या विकासाला नवी गती; ₹४०० कोटींच्या ४-लेन रिंगरोडला मंजुरी

लातूर/उदगीर/ अंबादास करकरे 

उदगीर शहराच्या सर्वांगीण विकासासाठी महत्त्वाचा ठरणाऱ्या सुमारे ₹४०० कोटी खर्चाच्या ४-लेन रिंगरोड प्रकल्पाला मंजुरी मिळाल्याने शहराच्या विकासाला नवी गती मिळणार आहे. केंद्रीय रस्ते वाहतूक व महामार्ग मंत्री नितीन गडकरी यांच्या माध्यमातून या महत्त्वाकांक्षी प्रकल्पाला हिरवा कंदील मिळाल्याने नागरिकांमध्ये समाधान व्यक्त होत आहे.

उदगीर शहरातील वाढती वाहतूक, शहरातून होणारी जड वाहनांची वर्दळ आणि भविष्यातील विकासाच्या गरजा लक्षात घेऊन रिंगरोडची मागणी अनेक वर्षांपासून करण्यात येत होती. या प्रकल्पासाठी स्थानिक लोकप्रतिनिधींनी आणि प्रशासनाने सातत्याने पाठपुरावा केला. अखेर या प्रयत्नांना यश मिळाले असून ४-लेन रिंगरोडच्या उभारणीचा मार्ग मोकळा झाला आहे.

प्रस्तावित रिंगरोडमुळे शहरातील मुख्य रस्त्यांवरील वाहतुकीचा ताण कमी होणार असून लातूर, नांदेड, बिदर आणि इतर भागांकडे जाणाऱ्या वाहनांना शहरात न शिरता पर्यायी मार्ग उपलब्ध होणार आहे. त्यामुळे वाहतूक कोंडी, अपघातांचे प्रमाण आणि प्रवासाचा कालावधी कमी होण्यास मदत होणार आहे.

या रिंगरोडमुळे शहराभोवती नवीन निवासी, व्यावसायिक आणि औद्योगिक क्षेत्रांच्या विकासाला चालना मिळेल. तसेच गुंतवणूक, रोजगारनिर्मिती आणि स्थानिक व्यापार वाढीसाठीही हा प्रकल्प महत्त्वाचा ठरणार आहे. उदगीर शहराच्या भविष्यातील विस्ताराला दिशा देणारा हा प्रकल्प असल्याचे मत नागरिकांकडून व्यक्त करण्यात येत आहे.

या मंजुरीबद्दल नागरिकांनी केंद्रीय मंत्री नितीन गडकरी यांचे आभार मानले असून उदगीरच्या विकासासाठी सातत्याने प्रयत्न करणाऱ्या संबंधित लोकप्रतिनिधींचेही अभिनंदन केले आहे.