अंबादास करकरे 

लातूर, दि. ६ : विधान परिषद निवडणूक २०२६ च्या पार्श्वभूमीवर धाराशिव-लातूर-बीड स्थानिक स्वराज्य संस्था मतदारसंघातील महाविकास आघाडी व मित्र पक्षाचे अधिकृत उमेदवार महेश देशमुख यांच्या प्रचारार्थ आज लातूर येथे पत्रकार परिषदेचे आयोजन करण्यात आले. या पत्रकार परिषदेला काँग्रेसचे वरिष्ठ नेते, महाविकास आघाडीचे पदाधिकारी, कार्यकर्ते तसेच लातूर शहर व जिल्ह्यातील पत्रकार मोठ्या संख्येने उपस्थित होते.

यावेळी वक्त्यांनी सांगितले की, महाराष्ट्रातील विधान परिषद निवडणुका अत्यंत महत्त्वाच्या असून धाराशिव-लातूर-बीड मतदारसंघात महाविकास आघाडीने महेश देशमुख यांच्यासारख्या सामान्य कुटुंबातील, शेतकरी व युवकांचे प्रतिनिधित्व करणाऱ्या उमेदवाराला संधी दिली आहे. त्यांच्या माध्यमातून या तीन जिल्ह्यांतील प्रलंबित प्रश्नांना विधान परिषदेत प्रभावीपणे वाचा फोडली जाईल, असा विश्वास व्यक्त करण्यात आला.

महेश देशमुख यांनी यापूर्वी स्थानिक स्वराज्य संस्थेच्या निवडणुकीत विक्रमी मतांनी विजय मिळवून आपली लोकाभिमुख कार्यशैली सिद्ध केली असल्याचे सांगण्यात आले. सामान्य नागरिकांशी सहज संपर्क साधणारे, लोकांच्या प्रश्नांसाठी तत्पर राहणारे आणि विकासासाठी सातत्याने प्रयत्न करणारे नेतृत्व म्हणून त्यांची ओळख असल्याचे वक्त्यांनी नमूद केले.

स्थानिक स्वराज्य संस्थांमधील लोकप्रतिनिधी हेच या निवडणुकीचे मतदार असल्याने त्यांनी उमेदवाराची कार्यक्षमता, लोकसंपर्क आणि जनहिताची भूमिका लक्षात घेऊन मतदान करावे, असे आवाहन करण्यात आले. आगामी पंधरा दिवसांत महाविकास आघाडीचे सर्व नेते व कार्यकर्ते अधिक जोमाने प्रचारात सहभागी होणार असल्याचेही सांगण्यात आले.

पत्रकार परिषदेत माध्यमांनी या निवडणुकीतील महाविकास आघाडीची भूमिका आणि उमेदवाराची भूमिका जनतेपर्यंत व मतदारांपर्यंत प्रभावीपणे पोहोचवावी, अशी विनंती करण्यात आली. माध्यमांच्या माध्यमातून जनमत घडविण्यात महत्त्वाची भूमिका असल्याचा विश्वासही व्यक्त करण्यात आला.

यावेळी महाविकास आघाडीसोबत मित्र पक्ष म्हणून वंचित बहुजन आघाडीचे नेते प्रकाश आंबेडकर यांच्या नेतृत्वाखालील पक्षाचा पाठिंबा असल्याचे सांगण्यात आले. महेश देशमुख यांच्या विजयासाठी सर्व घटक पक्ष एकजुटीने काम करणार असल्याचा निर्धार यावेळी व्यक्त करण्यात आला.

शेवटी महेश देशमुख यांना विजयाच्या शुभेच्छा देत, विधान परिषदेत धाराशिव, लातूर आणि बीड जिल्ह्यांच्या विकासासाठी सक्षम नेतृत्व मिळेल, असा विश्वास उपस्थित नेत्यांनी व्यक्त केला.